नेपाली कांग्रेस इतर समूहको राष्ट्रिय भेला ५ बुँदे प्रस्ताव पारित गर्दै सम्पन्न: १५ औँ महाधिवेशन देउवाकै नेतृत्वमा हुने
नेपाली कांग्रेसको इतर समूहले आयोजना गरेको तीन दिने राष्ट्रिय भेला विभिन्न ५ वटा महत्त्वपूर्ण प्रस्तावहरू पारित गर्दै सम्पन्न भएको छ। भेलाले पार्टीको आगामी १५ औँ महाधिवेशन, धार्मिक पहिचान र संविधान संशोधन जस्ता मुख्य विषयहरूमा सर्वसम्मत रूपमा बुँदे प्रस्ताव पारित गरेको छ।
भेलाले पारित गरेका मुख्य ५ निर्णयहरू यस प्रकार छन्:
- शेरबहादुर देउवाकै नेतृत्वमा १५ औँ महाधिवेशन: १४ औँ महाधिवेशनबाट निर्वाचित केन्द्रीय कार्यसमितिको निर्णय अनुसार १५ औँ महाधिवेशन सम्पन्न गर्ने प्रतिबद्धता जनाइएको छ। निवर्तमान सभापति शेरबहादुर देउवाकै नेतृत्वमा महाधिवेशन सम्पन्न हुने र पार्टीलाई एकताबद्ध बनाइने विश्वास व्यक्त गरिएको छ। महाधिवेशन नहुँदासम्म नियमित क्रियाकलाप सभापतिको निर्देशनमा राष्ट्रिय भेला र सम्मेलनका संयोजकहरूले सञ्चालन गर्नेछन्।
- बीपीको मेलमिलाप नीति र संवाद: वि.सं. २०३३ मा जननायक बी.पी. कोइरालाले अघि सारेको राष्ट्रिय एकता र मेलमिलापको नीतिलाई पुनः स्मरण गर्दै वर्तमान असहज परिस्थितिमा राष्ट्रियता र लोकतन्त्रको सुदृढीकरणका लागि सबै लोकतन्त्रवादी शक्तिहरूसँग संवाद गरेर अघि बढ्ने निर्णय गरिएको छ।
- सनातन धर्मलाई राष्ट्रिय पहिचान बनाइने: नेपालको सनातनदेखि चलिआएको धर्म र संस्कृतिलाई राष्ट्रिय पहिचानका रूपमा अघि बढाउने प्रस्ताव पारित भएको छ। हिन्दु, बौद्ध, किराँत र प्राकृत धर्मको संरक्षण गर्दै धार्मिक स्वतन्त्रता र सामाजिक सद्भाव सुनिश्चित गर्ने प्रतिबद्धता कांग्रेसले जनाएको छ।
- संविधान संशोधनमा पहल: वर्तमान संविधानमा देखिएका अस्पष्टता र जनअपेक्षालाई सम्बोधन गर्न आवश्यक संशोधनका लागि कांग्रेसले नेतृत्वदायी पहल गर्नेछ। संविधानको परिधिभित्र रहेरै सबै पक्षहरूसँग संवादमार्फत निकास खोजिने भेलाको निष्कर्ष छ।
- पार्टी सुदृढीकरण र एकता: पार्टीभित्र आन्तरिक लोकतन्त्र, संगठन सुदृढीकरण र भ्रातृ संस्थाहरूको परिचालनलाई चुस्त बनाउँदै लैजाने निर्णय गरिएको छ।
विज्ञापन
यहाँको लागि एडमिनमा ब्यानर थप्नुहोस्
