ईपीएस आवेदनकर्ताको चाप बढेपछि राहदानी सेवा दुई सिफ्टमा सेवा सञ्चालन हुने

दक्षिण कोरियाको रोजगार अनुमति प्रणाली (ईपीएस) अन्तर्गत आवेदन दिने सेवाग्राहीको चाप बढेपछि राहदानी विभागले विद्युतीय राहदानी सेवा दुई सिफ्टमा सञ्चालन गर्ने भएको छ।

विभागका अनुसार साउन १४ देखि १८ गतेसम्म पहिलो सिफ्ट बिहान ७ बजेदेखि दिउँसो २ बजेसम्म र दोस्रो सिफ्ट दिउँसो २ बजेदेखि राति ९ बजेसम्म सञ्चालन हुनेछ। शनिबार, आइतबार तथा सार्वजनिक बिदाका दिन पनि बिहान १० बजेदेखि बेलुकी ४ बजेसम्म सेवा दिइने विभागले जनाएको छ।

ईपीएस आवेदनका लागि राहदानी अनिवार्य भएकाले पछिल्लो समय राहदानी बनाउन आउने सेवाग्राहीको संख्या बढेको विभागले जनाएको छ। बढ्दो चाप व्यवस्थापन गरी सेवाग्राहीलाई समयमै सेवा उपलब्ध गराउन अतिरिक्त समय र दुई सिफ्टमा सेवा सञ्चालन गरिएको विभागले जनाएको छ।