सुनको मूल्य तोलामा १ हजार ६ सय रुपैयाँले वृद्धि

नेपाली बजारमा आइतबार सुनको मूल्य पुनः बढेको छ। नेपाल सुनचाँदी व्यवसायी महासंघका अनुसार छापावाल सुनको मूल्य तोलामा १ हजार ६ सय रुपैयाँले वृद्धि भई २ लाख ८७ हजार १ सय रुपैयाँ कायम भएको छ। शुक्रबार छापावाल सुन प्रतितोला २ लाख ८५ हजार ५ सय रुपैयाँमा कारोबार भएको थियो।

त्यसैगरी, चाँदीको मूल्य पनि तोलामा ६० रुपैयाँले बढेर ४ हजार ४१० रुपैयाँ पुगेको महासंघले जनाएको छ। शुक्रबार चाँदी प्रतितोला ४ हजार ३५० रुपैयाँमा कारोबार भएको थियो।

अन्तर्राष्ट्रिय बजारमा पनि सुनको मूल्य बढ्दो क्रममा रहेको छ। आज सुन प्रति औंस ४ हजार ५२ अमेरिकी डलर र चाँदी प्रति औंस ५८ अमेरिकी डलरमा कारोबार भइरहेको अन्तर्राष्ट्रिय बजारको तथ्यांकले देखाएको छ। नेपालमा अन्तर्राष्ट्रिय बजारको मूल्य, विनिमय दर तथा स्थानीय मागका आधारमा दैनिक रूपमा सुनचाँदीको मूल्य निर्धारण हुँदै आएको छ।